Dilhad giz kozh ar Vro Vigoudenn

Dilhad roue pe dilhad rouanez gwisket gant peizanted, a veze lâret diwar-benn tud ar Vro Vigoudenn. N'eus ket ur vro all e Breizh ma neus an dud lakaet kement a arz hag a zanvez kaer ha ker d'ober o dilhad hengounel hag er Vro Vigoudenn: koefoù uhel, broderezhioù, ha kodoù sokial strizh da lakaat diforc'h kenetreze. Dilhad labour, dilhad lid, dilhad kañv, kement giz bet er Vro Vigoudenn abaoe an XIXvet kañtved a gavoc'h el levr "le Costume bigouden" dre luc'hskeudennoù, tresadennoù ha skridoù, gras d'al labour berniañ ha renabliñ bet graet gant André Charlot ha Michel Bolzer. Ar sintezenn fonnus-se, leugn a ditouroù teknik, zo displeget deomp en abadenn gant Kael Bolzer.