Baleadenn en Traouieroù da heul Bleuñvenn Konan

War-du aod ar vein ruz, e hanternoz Bro-Dreger, zo traoù brav da welet hag istorioù kaer da glevet. Adalek miz Mae e vo moaien deoc'h mont da heul baleadennoù e brezhoneg kinniget gant Bleuñvenn Konan, deus ar gevredigezh Nevez-Amzer Tregastell. Pourmenadennoù aozet dindan tok Ti an arvor Plomanac'h ha kêr Perroz-Gireg. Baleadennoù tro-dro ar Sklêrder diwar-benn glad hag istor ar vro hag ivez baleadennoù evit ar vugale en Traouieroù, un draoñienn vurzhudus etre Perroz ha Tregastell... Mag oc'h intereset e vo baleadennoù e miz Mae, miz Even, miz Gouhere, miz Eost ha miz Gwengolo. A-benn gouzout hiroc'h war an deiziadoù e c'hallit mont en darempred gant Ti an arvor Plomanac'h.